Inteligjenca Artificiale ka ndihmuar në zgjidhjen e një misteri biologjik që shumë shkencëtarë nuk arrinin t’i jepnin shpjegim prej vitesh. Të kuptosh sesi një proteinë ka formë tre dimensionale ka ngritur pikëpyetje për gjysmë shekulli tani më.
Por roboti londinez me emër DeepMind ka sjellë përgjigjet që kërkonim. Ky zbulim do të na ndihmojë të zbërthejmë misteret e shumë sëmundjeve përfshi këtu Covid-19.
Një nga shkencëtarët pjesë e panelit është dhe amerikani Andriy Kryshtafovych nga Universiteti i Kalifornisë, i cili e konsideron këtë arritje si të jashtëzakonshme.
“Të arrish të identifikosh formën e proteinave shpejt dhe në mënyrë të saktë ka potencialin të sjellë revolucionin botën shkencore”, shprehet ai.
Proteinat janë pjesë e organizmit të çdo gjallese dhe luajnë rol të rëndësishëm në proceset kimike esenciale për jetën. Ato përbëhen nga aminoacide që kombinohen më miliona mënyra dhe kanë forma, të cilat janë kyç në mirëmbajtjen e organizmit dhe të ndihmojnë atë të funksionojë.
Shumë sëmundje lidhen me rolin e proteinave në katalizimin e enzimave, antitrupave si dhe hormoneve.
“Çdo riorganizim i të tilla molekulave ka efekt vital dhe katastrofik në organizmin tonë. Kështu që një nga mënyrat më efikase për të kuptuar sëmundjet dhe për të gjetur kurat, është të studiojmë proteinat e përfshira aty”, thotë për BBC, Dr. John Moult nga universiteti amerikan i Maryland, njëkohësisht dhe drejtor i panelit të shkencëtarëve.
Mënyra më e mirë për të arritur në përfundimin e formës së një proteine është të studiosh sekuencat e aminoacideve. Dhe pikërisht këtë bën DeepMind, duke e zmadhuar në një shkallë 0-100 për ta parë më të strukturuar 3 dimensionalisht, për pasojë më të qartë për syrin.
Të jemi në dijeni të strukturës së proteinës ndikon në krijimin e medikamentit që mund të parandalojë sëmundje të tilla si kanceri, mplakja e trurit, apo sëmundjet infektuese. I tillë është dhe studimi që po bëhet për mënyrën sesi proteinat në sipërfaqe të Sars Cov-2 ndërveprojnë me receptorët në qelizat njerëzore.
