Wikipedia e shkruar me inteligjencë artificiale? Themeluesi Jimmy Wales mund ta konsiderojë këtë mundësi edhe pse ai është i vetëdijshëm për problemet e lidhura.
Ai tha këtë në një intervistë për faqen e internetit Evening Standard. “Nga diskutimet në komunitetin Wikipedia që kam parë deri tani, njerëzit janë të kujdesshëm në kuptimin që ne e dimë se ka modele që nuk janë mjaftueshëm të mira, por ideja është intriguese dhe do të ofronte shumë mundësi,” ka theksuar Uellsi. Një teknologji si ChatGpt ka “halucinacione”, me fjalë të tjera prirjen për të shpikur gjëra nga hiçi, “një element shumë i rrezikshëm për Wikipedia”.
Sipas Uellsit, një integrim i ardhshëm i AI në shkrimin dhe rishikimin e hyrjeve do të kërkonte që algoritmet të arrijnë një fazë më të madhe të përsosjes që mund të shfaqet që në fillim të këtij viti, me lëshimin e Gpt-5, modeli i ri ChatGpt që premton t’i afrohet edhe më shumë gjuhës njerëzore.
Uellsi thotë se ndërsa ChatGpt ka tërhequr interesin e të gjithëve javët e fundit, testet e tij tregojnë se ka ende shumë të meta. “Një nga problemet me ChatGpt aktual është ajo që industria i quan ‘halucinacione’,” përsërit ai. Bashkëthemeluesi i enciklopedisë nuk është i vetmi që i ka vënë re këto kufizime. Muajin e kaluar, David Smerdon, një ekonomist në Universitetin e Queensland në Australi, pyeti ChatGpt: “Cili është dokumenti ekonomik më i cituar i të gjitha kohërave?”; brenda pak sekondash chatbot gjeti një përgjigje. “Artikulli ekonomik më i cituar i të gjitha kohërave është “A Theory of Economic History” nga Douglass North dhe Robert Thomas, i cili u botua në The Journal of Economic History në 1969.” Një dokument inekzistent, i cili nuk ka asnjë gjurmë as në internet dhe as në biblioteka.
