Tirana International Film Festival ka çelur portën për 254 filma të kategorive të ndryshme për publikun.
Një gotë verë dhe biseda mes kineastësh kanë qenë preludi i 10 ditëve që janë mbushur me filma, imazhe, ide dhe diskutime. Ndonëse jo në konkurim, edicioni i 15-të i TIFF është çelur nga një prodhim shqiptar e pikërisht filmi “Elvis kthehet në shtëpi” nga regjisori Fatmir Koçi.
Megjithë qëllimin fisnik të sjelljes së temës së luftës dhe impenjimit të aktorëve filmi ishte nën nivelin mesatar, edhe pse merr përsipër të trajtojë një tematike të madhe dhe që ngjall diskutime dhe ndjeshmëri. Filmi “Elvis walks home” sjell në rolin e protagonistit të riun Dritan Kastrati i cili jeton ne Angli prej shume vitesh….si në jetë ashtu edhe në film ai është një lloj Elvisi aventuresk që kthehet në shtëpi për të sjellë paqe dhe shpëtim me muzikë.
“Kam jetuar shumë në Angli dhe me ardh në Shqipëri të bëj një film shqiptar, i tregojmë botës që kemi talente është kënaqësi e madhe” thotë aktori Dritan Kastrati. “Roli ka qenë afër meje, une kam ikur jasht shtetit, jam kthyer në Shqipëri dhe kam parë që kanë ndryshuar gjërat” tha ai.
Ndërsa Samueli është një nga djelmoshat e vegjël që po i ikin luftës në Ballkan edhe pse nuk kuptohet qarte ku janë, nga kush frikësohen dhe kush është armiku, një lloj parodie e luftës. “Filmi tregon një vend pa mëshirë që edhe fëmijët mund të sulmoheshin në atë kohë” thotë aktori Samuel Vargu. “Nuk ka si lufta, është gjëja më e tmerrshme që mund të ndodhi” thotë Samueli.
Gjatë ditëve të festivalit, në kinema Agimi dhe në Teatrin e Kukullave do të keni mundësi të ndiqni filma të vlerësuar gjerësisht në festivalet më të rëndësishme europiane të kategorisë A. Ndërkohë që kategoria FOKUS i bën homazh regjisorit të madh shqiptar Viktor Gjika, me rastin e 80-vjetorit të lindjes. Në bashkëpunim të ngushtë me arkivin e filmit do të projektohen 4 filma të tij më të spikatur të subtitruar në gjuhën angleze për spektatorët e huaj mysafirë të TIFF.
