Pas disa ditësh pritje, Olsi Bylyku ka njoftuar se sot në mbrëmje në orën 21:00 starton show i drejtuar nga vetë ai, “Roped with Olsi”. Programi i drejtuar nga Olsi do të transmetohet në platformat online dhe do të jetë i akesueshëm nga kushdo që ka një aparat celular, smartphone apo kompjuter. Më herët aktori kishte shfaqur disa video dhe foto nga xhirimet dhe prapaskenat por pa zbuluar asnjë detaj se çfarë do të ndodhë gjatë show-t apo se çfarë rubrikash ai përmban.
Ajo që dimë deri tani është se e ftuara e parë e Olsit është këngëtarja dhe autorja e teksteve Filloreta Raçi, Fifi. Në spotin e publikuar pak ditë më parë që i paraprinte edhe premierës së transmetimit të show-t bie në sy se përveç intervistës audienca do të vihet përballë humorit dhe situatave që prekin thuajse këdo në përditshmëri.
Nga vetë emri i show-t “Roped with Olsi”, aktori ka premtuar se të gjithë do të qëndrojnë të lidhur pas këtij projekti pasi vetë të ftuarit do të përgjigjen për pyetje që jo çdokush ka guxuar t’ia bëjë e mbi të gjitha do të shfaqen për publikun ashtu sikundër ata janë në të vërtetë. Show do të jetë i përjavshëm dhe do të transmetohet çdo të mërkurë në orën 21:00. Tanimë na mbetet veç të shohin se çfarë surprizash do të na sjellë sonte Olsi…
