Seriali i fundit i Netflix, Monsters: The Lyle and Erik Menéndez Story, duket se ka nxitur një zhvillim të jashtëzakonshëm në çështjen reale të vëllezërve Menéndez, të cilët u dënuan për vrasjen e prindërve të tyre 28 vite më parë. Dy javë pas publikimit të serialit, është planifikuar një seancë e re gjyqësore për shkak të provave të reja që janë shfaqur.
Prokurori i Los Angeles, George Gascón, njoftoi gjatë një konference për shtyp se janë paraqitur prova të reja që përfshijnë një letër, të cilën njëri prej vëllezërve e kishte shkruar për një anëtar të familjes, duke përmendur se ishte viktimë e ngacmimeve nga babai i tij, Jose Menéndez. Gjithashtu, është dëgjuar dëshmia e një anëtari të grupit muzikor Menudo, i cili ka pohuar se ishte ngacmuar nga Jose Menéndez. Edhe pse këto prova ende nuk janë konfirmuar plotësisht, ato janë të mjaftueshme për të rihapur çështjen dhe për të rivlerësuar dënimin e vëllezërve, të cilët janë në burg prej vitesh.
Krijuesi i serialit, Ryan Murphy, ka komentuar se ky zhvillim vë në dukje fuqinë e televizionit dhe historive të jetës reale, duke theksuar se ky serial mund të jetë gjëja më e mirë që ka ndodhur për vëllezërit në 30 vitet e fundit, pasi po sjell vëmendje të re për rastin e tyre.
