RTSH 24, kanali i ri informativ, filloi transmetimin me një pamje të rinovuar dhe infrastrukturë të përmirësuar. Në një intervistë të veçantë, kryeredaktori Nolian Lole zbuloi detajet mbi nisjen e kanalit dhe synimet për të ardhmen.
“Synuam që të nisnim më 1 Maj, për të simbolizuar përkushtimin tonë ndaj punonjësve dhe punës që bëjmë,” tha Lole. Ai shtoi se e gjithë infrastruktura dhe teknologjia janë modernizuar për të ofruar një eksperiencë të re për shikuesit.
Lole theksoi gjithashtu rëndësinë e burimeve njerëzore në suksesin e këtij nisjeje, duke vlerësuar profesionalizmin e ekipit të RTSH 24. Gazetarja me eksperiencë, Albana Agolli, e cila tani është një nga moderatorët kryesorë, nënvizoi angazhimin për të ofruar një informacion të besueshëm dhe të saktë, duke theksuar se për RTSH 24, cilësia e informacionit ka prioritet ndaj shpejtësisë.
Ky kanal i ri premton të jetë një burim kyç informativ për publikun, duke u përqendruar jo vetëm në lajme, por edhe në krijimin e një platforme për diskutime të thella dhe analiza të gjera. Më tej, Lole bëri të ditur se RTSH 24 është në bashkëpunim të ngushtë me organizata dhe transmetues të tjerë ndërkombëtarë, duke përmendur lidhjet me EBU-në dhe transmetuesit publikë të rajonit dhe më gjerë.
Në fund, Drejtori i Përgjithshëm i RTSH, z. Peza, konfirmoi ambiciet e larta të këtij nisjeje dhe synimet për të bërë RTSH një ndër mediat më të rëndësishme në vend, duke theksuar se në vitet e ardhshme, RTSH 24 do të sjellë zhvillime të rëndësishme që do të ndikojnë pozitivisht në mediat shqiptare dhe audiencën që ato shërbejnë.
