Qeveria Sllovene gjatë orëve të vona të natës djeshme ka shpallur zyrtarisht fundin e pandemisë botërore Covid-19.
Kështu Sllovenia bëhet vendi i parë në Evropë që shpall të ‘mbyllur’ çështjen me Covid-19. Kjo sipas mediave ndërkombëtare ka ardhur në një kohë ku Sllovenia për dy javët e fundit ka shënuar çdo ditë më pak se 7 raste të reja.
Njerëzit që vijnë tani në Slloveni nga shtetet e tjera të Bashkimit Evropian nuk do të jenë më të detyruar të hyjnë në një karantinë për shtatë ditë siç ishte rregull nga fillimi i prillit.
Vendi me 2 milion njerëz, i cili kufizohet me Italinë, Austrinë, Hungarinë dhe Kroacinë, ka raportuar 1,464 raste koronavirus dhe 103 vdekje.
“Sllovenia ka zbutur epideminë gjatë dy muajve të fundit … Sot Sllovenia ka pamjen më të mirë epidemiologjike në Evropë,” tha Kryeministri Janez Jansa para parlamentit të enjten.
Fundi i epidemisë do të thotë që disa masa, përfshirë ndihmën financiare për qytetarët dhe firmat e goditura nga koronavirusi, do të skadojnë në fund të majit.
Qeveria tha se shtetasit e huaj që tregojnë shenja të infeksionit koronavirus ende nuk do të lejohen të hyjnë në vend.
Një karantinë prej të paktën 14 ditësh do të mbetet në vend për njerëzit nga shtetet jo të BE-së, përveç disa përjashtimeve përfshirë diplomatët dhe njerëzit që transportojnë ngarkesa.
Qytetarët do të duhet të ndjekin rregullat për të parandaluar një përhapje të mundshme të infeksionit.
Njerëzit u kërkohet të veshin maska në hapësira publike, të qëndrojnë së paku 1.5 metra larg dhe të dezinfektojnë duart kur hyjnë në hapësira publike.
Që nga mesi i marsit, Sllovenia ka mbyllur të gjitha shkollat, institucionet sportive dhe kulturore, baret, restorantet, hotelet dhe dyqanet përveç dyqaneve të ushqimit dhe ilaçeve, ndërsa anuloi edhe transportin publik.
Qeveria ka filluar lehtësimin e bllokimit nga 20 Prilli. Transporti publik rifilloi në fillim të kësaj jave ndërsa javën e ardhshme disa nxënës do të kthehen në shkolla. Të gjitha baret dhe restorantet si dhe hotelet e vogla me deri në 30 tavolina do të lejohen të hapen javën e ardhshme.
