Ndeshja shumë e rëndësishme e Kombëtares tonë të futbollit me përfaqësuesen angleze, e programuar për t’u zhvilluar të dielën në orën 18:00, rrezikon të anullohet për shkak se Policia e Shtetit nuk merr përsipër marrjen e masave për organizimin e ndeshjes. Kështu bën me dije Federata Shqiptare e Futbollit (FSHF) me anë të një njoftimi, ku thuhet se në një shkresë të firmosur nga drejtori i Policisë së Tiranës, Rebani Jaupi, theksohet se strukturat e Drejtorisë Vendore të Policisë Tiranë nuk garantojnë marrjen e masave para, gjatë dhe pas zhvillimit të ndeshjes. Në këtë mënyrë, FSHF kërkon reagimin urgjent nga institucionet pasi anulimi i ndeshjes Shqipëri-Angli do të kishte pasoja katastrofike për imazhin e vendit tonë.
Njoftimi i plotë i FSHF:
“Sot në Federatën Shqiptare të Futbollit ka mbërritur një shkresë, me numër protokolli 2877, e datës 23.03.2021, nga Drejtoria Vendore e Policisë Tiranë, me firmën e Drejtuesit të Parë, Rebani Jaupi, e cila thekson se strukturat e Drejtorisë Vendore të Policisë Tiranë nuk garantojnë marrjen e masave para, gjatë dhe pas zhvillimit të ndeshjes Shqipëri-Angli, në datë 28 Mars 2021, ora 18:00.
Gjendur përballë situatës ku autoritetet shtetërore nuk kanë reaguar pas kërkesës së Federatës Shqiptare të Futbollit, të datës 17.03.2021, me numër protokolli 538, drejtuar Znj. Dallëndyshe Bici, Drejtuese e Inspektoriatit Kombëtar të Mbrojtjes së Territorit dhe Z. Mariglen Qato, Drejtues i Inspektoriatit Urbanistik Vendor Bashkisë Tiranë, për lirimin e hapësirave në perimetrin e Stadiumit Kombëtar “Air Albania”, kërkojmë reagim urgjent të këtyre strukturave.
Anulimi i ndeshjes Shqipëri-Angli e parashikuar për t’u luajtur në “Air Albania Stadium”, do të kishte pasoja katastrofike për imazhin e vendit tonë, ekipin Kombëtar dhe në përgjithësi për futbollin shqiptar.”
