Dua Lipa në listën e 15 këngëtarëve më të mirë të BBC Music “Sounds of 2016”

Dua Lipa, këngëtarja shqiptare që është bërë e famshme në Britani, është listuar së fundmi edhe në 15 këngëtarët më të mirë në listën e përvitshme të BBC-së. Si çdo vit, një juri përzgjedhëse, e cila përbëhet nga 144 emra të njohur të muzikës, DJ, kritikë dhe producentë të suksesshëm në Britani, liston 15 artistët e ardhshëm të muzikës. Sot, është publikuar në faqen e BBC-së lista e 15 artistëve premtues për 2016-ën, mes të cilëve renditet edhe Dua Lipa, 20-vjeçarja me origjinë nga Kosova, e cila ka lindur në Londër

Shumë e njohur në Britani, 20-vjeçarja shqiptare është bërë pjesë shpeshherë e mediave të rëndësishme në vend, duke u krahasuar edhe me vokalin e emrave të mëdhenj në fushën e muzikës. Në një shkrim të disa muajve më parë, “The Guardian” e ka krahasuar Dua Lipa-n me këngëtaret e famshme Lana Del Rey dhe Jessie J, të njohura me hitet “Born to Die” dhe “Flashlight”: “Dua Lipa, nga Kosova, por që jeton në Londër, është e ngjashme në zë me Lana-n. Ka një zë të freskët, edhe më të mirë se Jessie J”,- shkruante “The Guardian”, duke e krahasuar muzikën e Dua Lipa-s si “black pop”.

Dua Lipa ka lindur në një familje kosovare në Londër, në vitin 1995. Në moshën 13- vjeçare, së bashku me familjen e saj është rikthyer në Kosovë për një kohë të shkurtër për t’u nisur sërish drejt Londrës në ndjekje të ëndrrës së saj. Dhe pse ka vijuar studimet e larta për aktrim, 20-vjeçarja ka spikatur me vokalin potent duke u bërë një nga zërat më premtues të së ardhmes. Gjatë dy viteve të fundit është folur shumë për të, pasi u bë e njohur me pjesëmarrjen në spotin e “X Factor UK”, ku edhe këndoi. Sipas BBC-së, Dua Lipa është rritur profesionalisht edhe nën kujdesin e producentit Emile Hayne, i cili ka bashkëpunuar me emra të njohur si: Lana Del Rey, Eminem dhe FKA Twigs. Në gushtin e këtij viti, Dua publikoi klipin e saj të parë “New Love.”