Këshilli Bashkiak i Tiranës, ditën e djeshme ka miratuar listën me 842 familje dhe çifte të reja, të cilat përfitojnë nga programi i kredisë së butë. Lajmin e ka bërë të ditur kryebashkiaku Erion Veliaj gjatë mbledhjes së Këshillit Bashkiak, ku ka bërë të ditur se ky program lehtëson çiftet e reja që të blejnë një shtëpi.
“Lajmi më i mirë që lidhet me rininë dhe çiftet e reja, ka të bëjë me 842 kredi të buta, të cilat do i japim në këtë raund të parë për 842 familje të reja, që kanë ardhur në Tiranë me aspirata e ëndrra të mëdha, për çifte të reja që kanë mbaruar Universitetin dhe sapo kanë filluar punë këtu. Strehimi i familjeve të reja apo i familjeve të prekura nga tërmeti do të jetë refreni i këtij viti”, tha në mbledhje Veliaj.
Fituesit që kanë plotësuar kriteret e përcaktuar me vendim të Këshillit Bashkiak, do të përfitojnë kredi me interesa të buta për të blerë shtëpi, falë programit që po aplikon Bashkia e Tiranës.
